Olís

Olíuverzlun Íslands var stofnuð 3. október 1927 og er því elsta fyrirtækið í samstæðu Haga.

Olís sérhæfir sig í sölu og þjónustu með eldsneyti og aðrar olíuvörur, auk skyndibita, ýmissa nauðsynjavara fyrir bílaeigendur, vörum til útivistar og ferðalaga ásamt fjölþættri þjónustu við sjávarútvegs-, verktaka- og flutningafyrirtæki um land allt. Grunnrekstur Olís hefur ávallt verið eldsneytissala, en með nýtingu á dreifineti fyrirtækisins og sérfræðiþekkingu hefur sala aukist á öðrum vörum, líkt og smurolíum, efnavörum, rekstrarvörum, gasi og nýlenduvörum.

Félagið hefur fylgt þeirri þróun sem átt hefur sér stað í íslensku atvinnulífi allt frá stofnun þess árið 1927. Félagið rekur fjölda þjónustustöðva undir vörumerki Olís ásamt sjálfsafgreiðslustöðvum undir vörumerki ÓB - ódýrt bensín. Undir starfsemi Olís er einnig rekstur verslunar Rekstrarlands og Stórkaups. Þá er Mjöll Frigg í 100% eigu Olís. Olís á 40% hlut í Olíudreifingu ehf. en Olíudreifing sér m.a. um birgðahald og dreifingu á fljótandi eldsneyti fyrir Olís.

Hlutverk Olís er að vera leiðandi verslunar- og þjónustufyrirtæki á íslenskum fyrirtækja- og einstaklingsmarkaði. Markmið fyrirtækisins er að bjóða viðskiptavinum góðar og samkeppnishæfar vörur á samkeppnishæfu verði ásamt sveigjanlegu sölu- og þjónustukerfi um allt land. 

Þá leggur Olís mikla áherslu á umhverfisvernd og mannúðarmál. Olís hefur í gegnum tíðina hugað vel að umhverfismálum sínum og átt í gjöfulu samstarfi við Landgræðsluna, allt frá árinu 1992. Olís hefur að sama skapi kolefnisjafnað rekstur sinn í samstarfi við Landgræðsluna og tekur einnig þátt í kostnaði þeirra viðskiptavina sem kjósa að kolefnisjafna eldsneytiskaup sín hjá bæði Olís og ÓB.

Olís rekur 28 þjónustustöðvar um land allt, en þar af eru tíu á höfuðborgarsvæðinu og 18 á landsbyggðinni. Á stærstu þjónustustöðvum sínum rekur Olís tvö skyndibitamerki, Grill 66 og Quiznos. Grill 66 er vörumerki í eigu félagsins en Quiznos hefur verið starfrækt með sérleyfi frá árinu 2007. 

Fyrsta ÓB-sjálfsafgreiðslustöðin var opnuð árið 1996 í Hafnarfirði en þær eru nú orðnar 43 talsins um land allt, þar af átta á höfuðborgarsvæðinu og 35 á landsbyggðinni.

Olíuverslun Íslands hf.
Skútuvogi 5
104 Reykjavík
Sími: 515-1000
Framkvæmdastjóri:
Jón Ólafur Halldórsson

 


  • olis-banner




Þetta vefsvæði byggir á Eplica