Stjórn Arcadia samþykkir væntanlegt yfirtökutilboð Philips Greens
Í framhaldi af samþykki stjórnar Arcadia á væntanlegu yfirtökutilboði Taveta Investments, (fjölskyldufyrirtæki Philip Green) í morgun, bendir allt til að félagið verði í eigu Taveta Investments áður en langt um líður. Hefð er fyrir því í Englandi að tilboð sem hljóta stuðning stjórnar séu samþykkt, auk þess sem Standard Life Investments, þriðji stærsti hluthafinn í Arcadia hefur lýst yfir að þeir muni styðja væntanlegt tilboð.
Eins áður hefur verið greint frá hafa Taveta Investments og Baugur Group hf. gert samkomulag um að Taveta Investments kaupi 20,1% hlut Baugs Group í Arcadia plc upp á 408 pens á hvern hlut eða um 21 milljarð íslenskra kr. Miðað er við að tilboðið sé staðgreitt eftir að 90% hluthafa hafa samþykkt tilboðið.
Fjárhagsleg áhrif á Baug Group
Ljóst er að ávinningur Baugs Group af væntanlegri sölu er mikill. Bókfært verð hlutarins var 11,6 milljarðar kr. í lok maí s.l. Hlutdeildarhagnaður er um 0,7 milljarðar kr. á tímabilinu júní - ágúst. Þá hefur mikill kostnaður fallið til við vegna undirbúnings við sameiginlegt tilboð Baugs Group og Taveta Investments. Má því áætla að hagnaður félagsins vegna sölu bréfanna verði um 8 milljarðar kr. eftir skatta og annan kostnað sem bókfærist á þriðja ársfjórðungi.
Baugur Group hefur fært 2 milljarða kr. hagnað í hlutdeildaraðferð frá því að bréfin voru keypt í Arcadia.
Skuldir vegna bréfanna eru um 3,6 milljarðar kr. og því mun lausafjárstaða Baugs Group styrkjast verulega eða um 18 milljarða kr. Félagið hefur ekki tekið ákvörðun um hvernig þessum fjármunum verður varið á annan hátt en þann að efla félagið enn frekar í sókn á erlendum vettvangi.
Stjórnendur Baugs Group telja þessa niðurstöðu viðunandi í ljósi þeirra atburða sem dundu á félaginu í síðustu viku.
Eins og kom fram í tilkynningu Taveta Investments í gær mun félagið upplýsa Baug Group þegar búið er að skilja vörumerkin sem voru tilefni samningaviðræðna frá öðrum rekstri Arcadia Group og að það verði tilbúið á þeim tíma, án nokkurra skuldbindinga að ræða við Baug Group um hugsanleg kaup félagsins á þeim vörumerkjum.