Fréttir


13. okt. 2016

ÚTILÍF OPNAR NÝJA OG GLÆSILEGA VERSLUN Í SMÁRALIND

Útilíf opnar í byrjun nóvember nýja og stórglæsilega verslun við nýja göngugötu í austurenda Smáralindar. Nýja verslunin verður um 1200 fermetrar að stærð. Í þessari nýju verslun sameinast starfsemi tveggja verslana Útilífs; verslunarinnar í Smáralind og verslunarinnar í Glæsibæ og verður vöruúrvalið í nýrri verslun enn meira en verið hefur á einum stað.  Þar renna saman í eina heild tvær mismunandi áherslur tveggja verslana; verslunarinnar í Smáralind sem hefur lagt mikla áherslu á skó og sport og svo verslunarinnar í Glæsibæ en hún hefur verið leiðandi í þjónustu og sölu á útivistar- og skíðavörum um áratugaskeið.

„Viðskiptavinir Útilífs fá nú enn þéttara vöruúrval og betri þjónustu í nýrri, nútímalegri og fallegri verslun. Sú þjónusta sem við höfum veitt í Glæsibæ, eins og útivistar- og skíðadeildin okkar, flytur í heilu lagi með skíðaverkstæði, tækjum, tólum og starfsfólki í Smáralind.  Á nýjum stað munum við hafa betri aðstöðu og rýmri opnunartíma og getum enn betur uppfyllt kröfur okkar viðskiptavina,“ segir Hörður Magnússon, rekstrarstjóri Útilífs.

Engar uppsagnir á starfsfólki í fullu starfi eru fyrirhugaðar vegna þessara breytinga.  Starfsfólk verslana Útilífs í Glæsibæ og Smáralind tekur til starfa í nýju versluninni og er mikil tilhlökkun hjá því að taka á móti viðskiptavinum til margra ára á nýjum stað.

Eftir þessar skipulagsbreytingar rekur Útilíf tvær verslanir, í Kringlunni og Smáralind.                                







Þetta vefsvæði byggir á Eplica