Fréttir


18. des. 2015

Fréttatilkynning 18. desember 2015

Mæðrastyrksnefnd og Hjálparstarf kirkjunnar fá 20 milljónir króna úr Pokasjóði

Bónus og Hagkaup eru aðilar að Pokasjóði verslunarinnar, sem í vikunni afhenti Hjálparstarfi kirkjunnar og Mæðrastyrksnefnd Reykjavíkur 20 milljónir króna til að deila út til skjólstæðinga sinna fyrir jólin.

Framlagi Pokasjóðs er skipt til helminga milli þessara hjálparstofnana og er í formi gjafakorta sem gilda í matvöruverslunum innan sjóðsins. Inneign á hverju korti er 10.000 kr. Gjafakortin nýtast til kaupa á öllum vörum til jólanna sem fást í verslunum innan Pokasjóðs, en þær eru um 160 talsins um allt land.

Framlag Pokasjóðs var afhent í Grensáskirkju. Bjarni Gíslason framkvæmdastjóri Hjálparstarfs kirkjunnar og Anna Pétursdóttir formaður Mæðrastyrksnefndar Reykjavíkur tóku á móti framlaginu úr hendi Bjarna Finssonar, formanns stjórnar Pokasjóðs.

Um Pokasjóð

Pokasjóður fær tekjur sínar af sölu plastburðarpoka í 160 verslunum um land allt.  Pokasjóður úthlutar styrkjum til verkefna sem heyra undir almannaheill.  Má þar nefna verkefni eins og umhverfismál, menningarmál, listir, íþróttir og mannúðarmál.  Pokasjóður hefur úthlutað um 1,5 milljarði króna til ýmissa verkefna á síðastliðnum 20 árum. 

 

Stjórn Pokasjóðs og fulltrúar hjálparstarfsins. Frá vinstri Bjarni Finnsson formaður stjórnar, Finnur Árnason stjórnarmaður, Bjarni Gíslason framkvæmdastjóri Hjálparstarfs kirkjunnar, Anna Pétursdóttir formaður Mæðrastyrksnefndar Reykjavíkur og stjórnarmennirnir Ómar Valdimarsson og Höskuldur Jónsson.

 






Þetta vefsvæði byggir á Eplica