Fréttir


14. maí 2014

Hagkaup og Bónus gefa 25 milljónir í þjarkasöfnunina

  Fyrirtækin Hagkaup og Bónus hafa gefið 25 milljónir króna í söfnun til kaupa á aðgerðarþjarka til skurðlækninga á Landspítala.  Framkvæmdastjórar fyrirtækjanna afhentu gjöfina formlega 14. maí 2014.

 Hagkaup og Bónus hafa frá stofnun fyrirtækjanna lagt ríka áherslu á að styrkja samfélagsverkefni og bæði fyrirtækin koma víða við í þeim efnum.  Áherslur undanfarin misseri hafa m.a. verið á forvarnarstarf, æskulýðsstarf íþróttafélaga og á tækjakaup fyrir Landspítala. 

 Aðgerðarþjarki (róbót) er í notkun á helstu sjúkrahúsum í nágrannalöndunum og nýtist til margvíslegra skurðaðgerða, sérstaklega við þvagfæraskurðlækningar sem og aðgerðir á grindarholslíffærum kvenna.  Inngripið verður minna en með hefðbundinni aðferð, hægt að hlífa betur nærliggjandi líffærum og viðkvæmri starfsemi og stuðla þannig að skjótari bata. Segja má að þjarkinn sé framlenging á fingrum skurðlæknisins þannig að allar hreyfingar hans verði nákvæmari.  Sýn skurðlæknisins í aðgerðarþjarkanum er auk þess framúrskarandi góð.

 Nú stendur yfir átak til þess að safna fé til að kaupa aðgerðaþjarka.  Framlag Hagkaups og Bónuss og allra annarra sem hafa látið fé af hendi rakna er afar hjálplegur stuðningur við mikilvægar framfarir í skurðlækningum hér á landi.

 Söfnun fyrir aðgerðarþjarka á vef Íslandsbanka:

Við kaupum róbót (http://www.islandsbanki.is/robot)

Söfnunarsjóður: 515-14-408005  kt. 470313-1370

 Guðmundur Marteinsson, framkvæmdastjóri Bónuss og Gunnar Ingi Sigurðsson, framkvæmdastjóri Hagkaups:
„Við erum óendanlega þakklát fyrir það traust sem viðskiptavinir sýna okkur.  Bónus var fyrr á árinu valið vinsælasta fyrirtæki landsins og Hagkaup lenti í 5 sæti á þeim lista.“ 

Við teljum það samfélagslega skyldu okkar að styðja við verkefni sem öll þjóðin nýtur góðs af.“

 Eiríkur Jónsson yfirlæknir: Þetta er ákaflega höfðingleg gjöf sem gefur þessu mikilvæga samfélagsverkefni byr undir undir báða vængi. Þetta framlag kemur á tímapunkti þegar mikils þurfti við. Nú sér til lands en samtals eru 70-80 milljónir króna í húsi eða sjónmáli.  Það eru um tveir þriðju þess sem við stefnum að í söfnuninni.  Hafi Bónus og Hagkaup heila þökk fyrir.

 Upplýsingar um aðgerðarþjarkann: Eiríkur Jónsson yfirlæknir, s. 825 5047

 Á myndinni eru Eiríkur Jónsson yfirlæknir, Guðmundur Marteinsson, framkvæmdastjóri Bónuss, Lilja Stefánsdóttir, framkvæmdastjóri skurðlækningasviðs, Gunnar Ingi Sigurðsson, framkvæmdastjóri Hagkaups og Rafn Hilmarsson þvagfæraskurðlæknir.







Þetta vefsvæði byggir á Eplica