Fréttir


10. jan. 2014

Upprunamerkingar á landbúnaðarvörum.

 Í ljósi umræðu Sigurðar Inga Jóhannssonar landbúnaðarráðherra og Sindra Sigurgeirssonar formanns bændasamtakanna um að neytendur séu blekktir varðandi upprunamerkingar á landbúnaðarvörum er nauðsynlegt að eftirfarandi komi fram:

Verslanir Haga eru fylgjandi upprunamerkingum á landbúnaðarvörum og telja nauðsynlegt að reglur séu settar þar um. Það er mikilvægt í þágu viðskiptavina að upplýsingar um uppruna vöru séu skýrar og réttar.  Með réttar upplýsingar er viðskiptavinurinn fullfær um að velja hvaða vöru hann vill.

Þær landbúnaðarvörur sem verslanir Haga flytja inn, m.a. allt kjöt og ostar eru merktar upprunalandi, þannig að viðskiptavinir vita hvaðan varan er sem þeir kaupa og hvaða innihald er í vörunni.   

Æskilegt er að landbúnaðarráðherra og formaður bændasamtakanna vandi málflutning sinn og beini ekki ásökunum að röngum aðilum.  Það er nú staðfest og öllum ljóst að íslenskir kjúklingaframleiðendur, svínakjötsframleiðendur og Mjólkursamsalan, fyrirtæki í eigu bænda, hafa flutt inn erlendar landbúnaðarvörur og selt sem innlenda framleiðslu.  Ef landbúnaðarráðherra og formaður bændasamtakanna líta á umrædd tilvik sem blekkingu, er eðlilegt að þeir tali skýrt og að þeir beini gagnrýni sinni í rétta átt, en ekki að versluninni.

Verslanir Haga vilja gjarnan koma að vinnu með ráðherra og bændasamtökunum sem snýr að bættum hag viðskiptavina sinna.

Með kveðju,

Finnur Árnason

Forstjóri Haga hf.

 

 

 

 






Þetta vefsvæði byggir á Eplica